🌀 أصعب الشخصيات اللي ممكن تتعامل معاها… مش اللي بتغلط، لأ… اللي مش قادر يعترف إنها ممكن تغلط أصلاً.
النوع ده من الناس بيحب يلبس أي ملاحظة عاديّة طاقية "الاستهداف"،
كأنك لما تقول رأيك في تصرف، تبقى بتتآمر عليه شخصيًا!
المشكلة مش في إنك تنتقده…
المشكلة إنه بيترجم كل حاجة على إنها هجوم على شخصه،
وبيهرب من أي مواجهة بمنتهى البساطة بكلمتين:
"أصل أنا اللي عملتها!"
طب يعني إيه؟ نعلّق التماثيل ونرُش ورد كل ما تعمل حركة؟
هو احنا بنتعامل مع بشر ولا مع كيان مقدّس؟
👤 الشخصية دي على الأغلب اتحطت في لحظة زمان فقدت فيها السيطرة أو الاهتمام أو الاحترام،
ومن ساعتها وهو بيحاول يخلق لنفسه مكان بأي شكل… حتى لو بالافتعال،
حتى لو بلبس دور الضحية،
حتى لو بكل "الدوشة النفسية" اللي بيعملها حوالين كل موقف بسيط.
الظريف بقي:
إنك تلاقيه دايمًا بيصنع لنفسه قيمة مش من احترام الناس…
لأ، من إحساسه إن الناس ضده!
كأن الهجوم الوهمي ده هو اللي بيقنعه إنه مهم، وإنه فوق التقييم.
النتيجة ايه:
١-صداع مستمر.
٢-تحوير في كل كلمة تتقال.
٣-ومجهود جبار بيتحطّ عشان يثبت لنفسه إنه مش ضعيف…
مع إنه في كل مرة بيبان قد إيه هو مش واثق، وقد إيه هو محتاج يكدب على نفسه الأول قبل ما يكدب على الناس.
🙃 هو مش نرجسي تمامًا، ومش ضحية تمامًا،
لكن خيط رفيع بيخليه دايمًا يعيش في المنطقة الرمادية دي…
لا هو قابل يشوف غلطه، ولا قادر يقنعنا إنه على حق،
بس صوتُه عالي… ومشكلته دايمًا مع الناس، مش مع تصرفاته.
انتوا ايه رايكم في الشخص ده ؟
و ايه الكلمة اللي ممكن توجهوها له
