- إحنا النهاردة هنمارس كل أنواع الحب
= إنت قليل الأدب
- إنتي فهمتي إيه؟ "يضحك ضحكة قصيرة ويهز رأسه" ، أنا أقصد الحب بمعناه الواسع، ده أنا ما صدقت اتلقيت ..
= تقصد ما صدقت لقيت، لقيتني يعني
- لا، اتلقيت .. طول عمري بشوف ستات أشكال وألوان .. بيقابلني في كل خطوة كعب عالي وضفيرة، مناخيري ما بتفارقهاش ريحة الست، بس ريحة أورديحي، زي ريحة المرَق! طول عمري بشوف ستات بس دي أول مرة أتشاف، أول مرة أتلاقَى، فاسمحيلي يا سينيوريتا أعيش اللحظة، ترقصي؟
= بلدي
- لأ، في حضني
= إنت طلعت رومانسي أوي
- محدش بيحس بقيمة الحاجة أد اللي محروم منها
= فاقد الشيء لا يعطيه
- فاقد الشيء هو أكثر إنسان محمّل بالشيء ، بالنحوي أهو
= إنت حكايتك حكاية
- أنا حكايتي "إنتي" .. الحب، الحلم القديم الجديد المعسكر في سراديب عقلي، اتبعتر لما شفتك، والحلم لما يتبعتر تبقى الرسالة واضحة : يا اتحقق، يا مُت! تعالي نمارس كل ألوان الحب عشان أتأكد إني عايش .. نرقص، نغني، نسهر، نهادي بعض، نرغي في التليفون بالساعات، تغِيري، أتخنق، تخاصميني، أعاند، تسوقي في الخصام، ما أقدرش أقاوم، أقرّب خطوة، تقربي اتنين، نتقابل في نقطة الصفر، ساعتها بس هأحلف إني ما مُتّش.❤
