عارف يعني إيه تبقى عايش…
بس روحك مش جواك
إحساس يشبه إنك تفتح عينيك على عالم ناقص،
عالم فيه كل حاجة
إلا الجزء اللي كان بيدفيك.
تتظاهر إنك موجود،
بس من جوا…
أنت عامل زي كتاب اتسحبت منه أهم صفحة،
والناس لسه بتقراه
من غير ما يفهموا إن المعنى ناقص،
وإنك مش قادر تقول
فين راحت الصفحة دي…
ولا ليه ما بترجعش.
روحك هناك…
في مكان انت حافظه
مش بس لأنه كان مكانك ،
لكن لأنك اتسِبت عنده،
زي أثر قديم محدش يعرف قيمته
غير اللي فقده.
وإنت بتمشي وتتنفس
كأنك نسخة بتقلد نفسها،
نسخة بتتظاهر إنها كاملة
مع إنها…
مفصولة عن أصلها.
تحاول تلم شتاتك،
تحاول تفهم نفسك،
بس كل ما تمد إيدك ناحية روحك
تحس كأنك بتمد إيدك
لـ هواء بيهرب من بين صوابِعك،
هواء كان ملكك
وبقى ينفر منك.
والوجع الحقيقي
مش إن روحك مش معاك…
لكن إنك عارف مكانها،
عارف المكان اللي مسكها ومش قادره تسيبه رغم انه سابها ،
ومش قادر تقول…
ولا حتى قادر تعترف
إنك واقف بره الحكاية
زي متفرج مش مقبول دخوله.
فتعيش…
وتسكت…
وتكمل الدور لآخره،
وأنت عارف إن الجزء الحقيقي منك
ماشي في اتجاه،
وإنت…
بتكمل في اتجاه تاني
عمرك ما هتلحقه.
وساعتها تفهم…
إنك مش ناقص روحك بس،
أنت ناقص المكان اللي كان مفروض مئواك
واتقفل ف وشك للأبد.. 💔
