ركبت عربية رايح رمسيس عادي جدا مع سواق باين جدا انه مبرشم.. مبرشم حرفيا .. وشه متأثر قوي بالبرشام.. ركبت قدام.. انا وهو لوحدينا.. العربيه حملت وطلعنا.. دفعتله عشره جنيه جنيه.. واداني اربعه جنيه.. شوية بتاع كيلو كدا.. قالي انت خدت الباقي بتاعك قلتله اه .. قالي لا مخدتوش.. قلتله و**** خدته.. قالي متحلفش.. انت مخدتوش.. روحت مطلعله الاربعه جنيه من جيبي قلتله اهو عشان تصدق.. قالي لا متضحكش عليا .. متطلعش فلوس من جيبك وتقولي اهي.. انت ليك اربعه جنيه .. قلتله بس انا و**** واخد الباقي حرام اخد فلوس حرام.. قالي ومش حرام تزعل اخوك بصلة.. قلتله طيب يريحك ايه.. قالي تاخدهم مني.. قلتله هات.
شوية بشوية .. قعد يمشي يمين وشمال.. خبط في عربية ملاكي وزنق ع عربية ميكروباص.. فالاتنين نزلوا وجوله كل واحد ع شباك.. واحد قاله انت خبطت فيا وواحد قاله انت زنقت عليا.. سابهم وبصلي.. قالي بيقولوا ايه عشان سامعهم بيصوصوا مش بيتكلموا.. قلتله بيقولوا انك زنقت عليهم.. قالي ما انا قاعد جنبك اهو ولا نزلت من العربية ولا زنقت ع حد.. بذمتك انا اتحركت من العربية.. يا استاذ بصلة.. هو قصده ان العربية هي اللي زنقت العربية.. قالي طيب وهو بيكلمني انا ليه ما يكلم العربية.
مسكت نفسي من الضحك شوية.. مشي 200 متر وقالي .. هو احنا كنا بنتخانق مع الناس ليه.. قلتله متشغلش بالك دي حاجة عشان مشاكل الجواز وانا حليتها.. قالي طيب انا اديتك باقي الاجرة بتاعتك.. قلتله اه مرتين .. ادتهالي مرتين.. وبص قدامك هنلبس في العربية اللي قدامنا.. قالي يا استاذ متضحكش عليا.. انا مدتكش الاجرة.. و**** لا تاخدها... يا عم و**** خدتها.. قالي و**** لو مخدتها ما اكلمك تاني.. يا سيدي احسن ما عنك ما كلمتني.. يعني هتزعلني يا استاذ.. قلتله اه.. قالي طيب طلاق تلاتة لانت واخد.. المهم عشان الطلاق.. خدتهم.. ومسكت الفكة كلها في ايدي.. بصلي كدا بصة شك.. وقالي بقولك ايه يا استاذ.. قلتله نعم.. قالي ما تجيب الفكة دي وخد العشره جنيه الصحيحة.. عشان ادي الباقي للاستاذ اللي جنبك.
نزلت وانا ونازل قالي سامحني بقي في الباقي.. انت شايف اهو مفيش فكة.
