عارف الصراع اللي بيبدأ جواك من غير ما حد يشوفه؟!
قلبك بيشدك ناحية حاجة أنت عارف كويس إنها مش ليك،
بس هو غصب عنه بيحن،
وبيفتح أبواب انتهت من زمان كأن النهاية ما حصلتش.
وفي الناحية التانية…
عقلك واقف ثابت،
بيقولك: “كفاية… الطريق ده مبقاش طريقك.”
بيقولها بعقل…
بس مفيهاش الدفا اللي القلب اتعود عليه.
وهناك…
في أعمق نقطة فيك،
كرامتك واقفة تصرخ،
مش بصوت عالي…
صوت هادي بس واجع،
زي حد بيناديك من آخر حتة مظلمة فيك:
“ما تهونش على نفسك… حتى لو هانت على غيرك.”
فتقف في النص.
ضايع.
مش عارف تمشي مين…
القلب اللي بيحب وبيتألم،
ولا العقل اللي بيفهم وبيحاربك،
ولا الكرامة اللي بتحميك من إنك تعمل حاجه ممكن تندم عليها وتضيع اكتر.
والحرب؟
الحرب مش بينك وبين حد.
الحرب جواك.
بتنهشك بصمت…
وبتوجعك أكتر من سبب الوجع نفسه.
والأسوأ؟
إن محدش شايف القتال،
محدش سامع الصوت،
غيرك.
ووسط كل ده عايش طبيعي وبتضحك وتهزر وسط الناس عشان تتجنب سماع كلام انت من جواك عارفه اصلا مش محتاج اللي يأكدلك عليه،
بس في الآخر…
هتختار اللي يحفظك مش اللي يوجعك.
يمكن يكون قلبك، ويمكن عقلك، او كرامتك
وهتعرف إن السلام مش إنك تكسب حد…
السلام إنك تكسب نفسك. 🌙🖤
