عارف يعني إيه تموت من جواك وانت لسه واقف؟
يعني تبقى عامل زي شمعه بتدوب من جوه
والناس شايفين النور بس…
ومحدش واخد باله إن كل دقيقة بتنقص منك حاجة.
تعيش في يومك
وكأنك مبنى عالي ثابت…
لكن محدش يعرف إن الأساسات جواه
بقت تراب بيتناثر من أقل هزة.
تبتسم…
كإن وشك ورقة متغرزة فيها ابتسامة بقوة،
لكن الورقة نفسها
مبلولة وجاهزة تتقطع من أقل لمسة.
أنت بتصرخ جوا صدرك
صرخة لو خرجت للعلن
كانت كسرت السما نصين،
لكن العالم شايفك ثابت
زي صخرة في نص البحر…
مش فاهمين إن الموج من جواها
بيحفر فيها سنة ورا سنة
لحد ما تبقى جوفاء.
ولما الليل ييجي…
وتقفل عليك بابك،
تقع زي سيف مكسور
اتكسرت حدته من كتر ما حارب وهو لوحده.
تعيط لحد ما صوتك
يبقى شبه الهوى البارد
اللي يعدي على روح فاضية
ويطلع منها صدى مالوش آخر.
ولما تفتكر ان دموعك خلصت
تلاقي نفسك بتعيط تاني
لحد ما تفقد وعيك،
مش ضعف…
لكن لأن الجسم نفسه
بقى زي قشرة بيض متروكة
ملهاش قوة تشيل اللي جواها.
وتصحى مش لأنك خفيت،
لكن لأنك مجبر
تلبس الماسك اللي حافظ عليك قايم.
ترجع للعالم بنفس القناع،
كأنك تمثال حجر
محدش فاهم إن الحجر ده
جواه قلب بينزف رملة
كل دقيقة.
وفي الآخر…
يقولوا عنك قوي.
بس محدش عرف
إن قوتك مش صلابة…
قوتك إنك لسه واقف
رغم إن روحك
بقت مقبرة هادية لذكريات موجعة
لسه عايشة جواك وبتهنش روحك بالبطئ وتسيبك متعلق في النص،
ولا طايل حياه،،
ولا بتنعم بالموت 💔
