مش عارف ليه مش مرتاح لفكرة إن هتخرج من الجامعة السنة دى...
و مش لاقي تفسير ، المفروض إن كله فرحان إنه هيتخرج و بيدأ يكون نفسه و هيخلص من المذاكرة...بس أنا حرفياً مرعوب من فكرة إنى هخلص من حياة الطالب و هدخل على مرحلة جديدة من حياتي...
هل مثلاً ده خوف من عقلي الباطن إنى أدعك فى سوق العمل و أتسحل ورا لقمة العيش؟؟
هل مثلاً لأن حياتي الجامعية مش زي فيلم الباشا تلميذ ولا الأفلام الأمريكاني فندمان على إن ذكرياتي فى الكلية مش أعظم حاجة؟؟
ولا العكس هو اللى صحيح ، و أنا زعلان إنى هسيب الجامعة و أسيب جو الطلبة و الفعاليات و الجو ده؟؟
ولا ده خوف من الفشل فى الحياة العملية؟؟ و خوف من المرمطة فى الجيش؟؟ و خوف من الدخول فى سباق مع الزمن و العمر علشان أتجوز قبل سن الأربعين؟؟ ولا خوف من الدخول فى منافسة معنوية وهمية مع الناس اللى حققت نجاحات عظيمة فى نفس مرحلتي العمرية؟؟
هل حد مر بالحالة دى قبل كده؟؟ ، و هل حد عنده حل علشان أنا مرعوب دلوقتي أكتر إن الحالة دى تنكد و تعكنن عليا واحدة من أفضل لحظات حياتي و هي لحظة تخرجي!! 😭💔😭
