نقاش ناس

[مصطفى مصطفى]

فيه ناس تقعد معاهم تحس بالدفا يطبطبوا عليك وممكن يواسوك حتى من غير كلام بتحس انهم حاسين بيك

وناس تقعد معاهم متبطلش ضحك وتقوم وانت مبسوط ومعاك طاقه تكمل بيها اليوم من غير نكد

وناس تقعد معاهم تتكلموا ف أى حاجه وكل حاجه من غير هدف وتكون برضه قايم مبسوط عشان فكيت دماغك شويه

وناس القعده معاهم زى ما قعدت زى ما قمت لا حاسس بحاجه ولا فاهم حاجه وتلاقى نفسك زهقان وبتدعى امتى الوقت يعدى عشان تمشى وممكن كمان تتلكك وتاخد بعضك وتطير

وناس تقعد معاهم تحس وسطهم انك غريب وانك مش شببهم رغم ان ممكن يكون أهدافكوا واحده وافكاركوا شبه بعض بس فيه حاجه غلط مش راكبه ع الموضوع

وناس تقعد معاهم بعد كام كلمه وكام حوار تلاقى دماغك بقت مليانه وتبقى مش عاوز تخلص القعده حتى من غير حوارات عميقه ولا كلام عن الذره ولا الانشطار النووى ولا حتى عن كيفية اختراع المحشى.

هى أرزاق **** مقسمها فيه ناس ممكن تديلك ده وتاخد منك ده
وناس ممكن تتفق مع ميولك ودماغك
وناس أرواحها بتقابل روحك
فى النهايه أنا بعتبر ان كل صنف من الناس دى احنا محتاجينه حتى لو كان الظاهر غير كده
لأن كل صنف منهم بيكمل جزء من شخصيتك ولو مش بيكملها يبقى بتتعلم منه حاجه عن نفسك او حاجه عن الحياه

إفتحوا القنوات اللى بينكوا وبين الناس
متضيقوش الحصار على نفسكوا
ومتحصروش نفسكوا فى مكان واحد او طريقه
واحده فى التعامل وبلاش تقول ده شبهى اوى هتعامل معاه وده مش شبهى خالص يبقى
هقفل الباب فى وشه
زى أنواع الزهور ممكن يكون فيه نوع محبب جدا لقلبك لكن ده لا يمنع انك تحب يكون عندك جنينه مليانه زهور من أنواع مختلفه.
تصبحوا على تنوع🌷

اضغط لقراءة المزيد...