وكإن روحي واقفة على حافة وجع مالوش آخر،
يمكن مكسورة… ويمكن مبقاش عندي طاقة تاني.
الحزن بقى هادي… بس بينهش في روحي.
وجع بقي ساكني،
بيصحى معايا،
وينام جنبي،
وبيتنفس قبلي.
بقيت بدور على حاجة…
معرفش هي ايه او يمكن عارفه لكن مش قادره اقولها.
يمكن حضن يوقف النار اللي جوه قلبي،
يمكن كلمة أنا مش هسيبك
حد يقولها ويعنيها…
مش يقولها ويمشي.
أنا مش ناقصاني ناس،
الناس كتير…
بس كأن مفيش حد هنا.
أنا ناقصاني أنا،
النسخة اللي كانت صافية،
اللي كانت خفيفة،
اللي كانت بتضحك بجد…
مش بتتظاهر إنها بخير.
عارفين يعني إيه الروح تبقى عطشانة؟
عطشانه لأمان… لسكينة… لفرحه من القلب
لحاجة تحضنك من غير ما تطلب.
أنا مش ضعيفة،
بس التعب بقي مزمن…
والقلب بقى مرهق من كتر ما حاول يفهم
ليه كل حاجة جميلة بتمشي،
وليه كل اللي بيفضل
هو الفراغ والوجع .
عشان كده بليل…
لما الدنيا تهدا
وبرجع أسكت،
بقول لنفسي بهدوء موجوع:
يمكن خلاص…
الوجع مبقاش ضيف.
ده بقى جزء من الروح،
ماشي معايا…
وبيتنفس معايا…
وبكمل بيه.
ولو هيسألوني إنتي كويسة؟
هقول: أنا واقفة… بس الوجع هو اللي شايلني. 🖤
