- تم حذف هذه الرسالة
= فكك
- نعم ؟
= فكك من اللي انتي جاية فيه
- جاية في إيه ؟ بعت رسالة بالغلط ومسحتها
= بصي يا آنسة صمت الشوارع الجانبية
- إسمي إسراء
= عاشت الأسامي، بصي يا آنسة إسراء، انتي بتستخدمي معايه أغـ.ـبى طريقة عرفتها البشرية آخر ٧ سنين في فتح كلام مع حد
- اللي هي ؟
= تبعتيلي نقطة في الشات وتمسحيها، اقوم أنا باعتلك علامة استفهام تقوليلي سوري بعتهالك غلط وافتح الحوار من عندي
- بس انا فعلا بعتها بالـ...
= اشتري مني بس، أنا عملت الحوار دا كتير وبقولك دخلة الجو حر أوي النهارده كريتيڤ اكتر منها
- يظهر ان مفيش فايدة في الإنكار
= مفيش فايدة في المطلق
- انا بس كانت عاجباني البوستات اللي بتكتبها وعايزة ...
= تقوليلي رأيك برايڤت عشان عمتك وولادها بيتابعوني ومينفعش تكتبيلي كومنتات
- لا خالتي وولادها
= مش هتفرق، هل وانتي تبعتيلي المسدچ دي سألتي نفسك انا مرتبي كام ؟
- هي دي حاجة متخصنيش بس لو عايز تقول ..
= ٦٢٠٠، دا لو ما اتخصمليش لأي سبب
- وبعدين
= مواصلاتي وأكلي وباقة التليفون وبقية مصاريفي الشخصية ٣٢٠٠، يتبقى معانا كام ؟
- ٣٠٠٠ جنيه
= خليكي فاكرة الرقم دا كويس عشان هنحتاجه
- أوكيه أنا كتبته
= هنفترض انك نجحتي تفتحي معايه الحوار الأولاني، اللي غالبا مش هياخد اكتر من عشر دقايق
- تمام
= هتيجي بكرا وتبعتيلي تاني عشان تقوليلي تعليقك على بوست اهبـ.ـل كنت كاتبه، بس مينفعش تعلقي عليه قدام الناس عشان عمتك وولادها بيتابعوني
- خالتي وولادها
= هقوم انا بعد بكرا حاطط بوست حزين
- هتدخلى تقولى آسفة لو بتطفل عليك، بس مالك زعلان ليه
= هقولك الكون أبدي والعذاب سرمدي
- وندخل مع بعض في حوار طويل يخلي كل واحد فينا يتكلم عن ذكرياته أكتر
= هتلاقيها مناسبة وتحكيلي عن خطيبك اللي خـlنك مع أعز صاحباتك
- لا مع خالتي وولادها
= هحكيلك انا عن خطيبتي اللي سابتني لما عرفت واحد أغنى مني
- هقولك احنا الاتنين بيننا حاجات مشتركة، اننا بنقابل الناس الغلط
= مع إن احنا الاتنين كدlبين وامهاتنا عارفين
- لا خالتي وولادها
= تاني يوم هبعتلك أغنية بعد الليالي بتاعة عمرو دياب
- هقولك اني بعشق عمرو دياب، وهبعتلك أغاني فيلم الشيماء بصوت سميرة أحمد
= هقولك اني بعشق صوت سميرة أحمد مع اني عارف ان اللي غنت أغاني الفيلم سعاد محمد
- هتاخد الواتس إمتى ؟
= مش قبل أسبوع، نكون اتعودنا نتكلم مع بعض
- هبتدي احط ستوريهات انت بس اللي بتشوفها
= هدخل اعلق عليها كل يوم، والكلام بيننا هيكتر
- هتعود على وجودك وهيحصل بيننا إعجاب متبادل
= هنحب بعض، ونتعلق ببعض
- حلو أوي، هتقابل بابا إمتى ؟
= الأسبوع الجاي، عشان تصدقي اني عايزك بجد
- وانا هضغط على أهلي عشان يوافقوا
= هيطلبوا مني شقة وعفش وشبكة ومهر وتكاليف فرح وحاجات تمنها يعمل بتاع مليون ونص
- انت مش حاسب الفوتوسيشن ؟
= حسبته
- هعمله في جزيرة المعادي
= معنديش مانع
- طب شد حيلك بقى فات ٦ شهور من الخطوبة وانت لسه معملتش حاجة
= ما انا بحوش ٣٠٠٠ جنيه في الشهر يعني في السنة بكام ؟
- ٣٦ ألف
= يعني في العشر سنين بكام ؟
- ٣٦٠ ألف
= يعني المليون ونص اللي محتاجينهم عشان نتجوز هنحوشهم في كام سنة ؟
- حوالي ٣٠ سنة لو محسبناش فرق سعر الدولار
= هكون انا بقى عندي ٦٠ سنة وانتي عندك ٥٤
- لأ ٥٥، انا بكرا هتم ٢٥
= كل سنة وانتي طيبة
- وانت طيب
= عمتك وولادها هيقعدوا يزنوا على ابوكي يفركش الخطوبة عشان انا ما انفعكيش
- خالتي وولادها
= هنسيب بعض وهنتعقد وانا هرجع اقضي حياتي شغل ونوم وقعاد عالقهوة
- وانا هدور على حد تاني ابدأ معاه نفس القصة من الأول، وابعتله نقطة واحذفها فيبعتلي علامة استفهام
= يا ريت تركزي المرادي وتختاري شخص معاه فلوس مش كحيان زيي
- وانا هعرف دا منين ؟
= من بروفايله، هتقدري تحددي مستواه المادي من نوع العربية بتاعته
- ما انت متصور جنب عربية ب٢ مليون و٤٠٠ ألف
= لا دي مش بتاعتي، دي كانت راكنة قدام الشركة اللي بشتغل فيها، اتصورت جنبها ومشيت
- تمام، تقدر ترشحلي حد طيب ؟
= هبعتلك ٣ أكونتات دلوقتي اختاري حد منهم
- ماشي، ألف شكر
= العفو، فرصة سعيدة
ده فشخ الواقع 🤣😂
