الواحد لما بيبقى صغير، كل حاجة بتبانله جامدة وحلوة أوي. التجارب اللي بتيجي بدري بيكون ليها طعم خاص ومميزات كتير، بس الأحلى إنك تعيش كل مرحلة في سنها الصح.
أنا بسبب ظروفي، كانت كل حاجاتي سابقة سني. حتى أصحابي معظم الوقت كانوا أكبر مني بكتير. عشت معاهم حاجات المفروض تيجي بعد سنين، مش في سني أنا خالص. كنت بعمل أفعال وأشوف مواقف تناسبهم هما، وده خلاني أحس إني "كبرت قبل ما أكبر".
لما الفترة دي خلصت، ولما بدأت أصاحب ناس من سني فعلاً او اضطريت ، لقيت نفسي ببص لتصرفاتهم وبقول: "إيه شغل العيال ده؟" حاجات كنت أنا بعملها زمان اللي هو المفروض ميكنش زمان ، بقيت أشوفها تافهة أو مش مناسبة. حسيت إن في حاجات فعلاً لازم تتعاش في وقتها، على قد سنك، مش تتقدم ولا تتأخر.
المتعة الحقيقية مش في الحدث لوحده، لا.. المتعة في التوقيت. لما تعمل حاجة في وقتها، بتحس بلذتها بجد لأن دماغك وعيك جاهزين يستقبلوها. أما لما تعملها بدري أوي، فغالباً بتعملها عشان تقلد بدون وعي ، عشان يقولوا عليك "ده راجل"، عشان تاخد احترام وسطهم، عشان ميعاملوكش على إنك لسه عيل صغير.
كنت بعمل حاجات كتير من غير ما أكون فاهم قيمتها ولا مستمتع بيها فعلاً. كنت بس "بقلد" وبحاول أثبت إني مش أقل من حد. وده خلاني أفوت المتعة الطبيعية اللي كان المفروض أعيشها لو كنت مستني الوقت المناسب.
المهم:
متحاولش تسابق سنك .
متكبرش قبل ما الدنيا تطلب منك.
عيش فترتك زي ما هي، استمتع بكل تفصيلة فيها، لأن لو سبقتها.. مش هتاخد منها المتعة اللي تستاهلها، ولا هتفهمها صح، لأن ببساطة ده مش وقتها.
كل سن ليه طعمه، وكل مرحلة ليها لذتها.. خليك في مكانك دلوقتي، عيشها على طول، لأن اللي جاي هييجي في وقته، وهيبقى أحلى بكتير لما توصل له وأنت جاهز .
انا مش عارف ولا فاهم مناسبة الكلام ده بس حد فكرني بحاجه برغم انها حلوه بس بيني ز بين نفسي زعلت اني مكنتش مستمتع زيه للدرجه انه فاكرها لحد دلوقتي .
فضفضه الناس الي مش بتبان حقيقتهم غير لما تقع
