بقالي فترة بحلم بالصورة دي بالظبط: باب مكتوب عليه "11 Men-only" وواقف قدامه واحدة لابسة قناع غريب. اللي فكرني بالحلم ده إني شفت المشهد ده قدامي: نفس الباب، بنفس طريقة الكتابة. الاختلاف بس إن الست دي مكنتش موجودة. ده كان لما كنت مسافر لمراتي وأولادي في مطروح نقضي أسبوع العيد هناك. بس قلتلهم يسبقوني عشان هخلص شغل وأحصلكم.
وأنا سايق على الطريق، ع المغربية كده، حسيت إن بطني وجعاني وكان لازم أدخل حمام. بس حمام ايه ده أنا في منطقة شبه مفيهاش حد! كان لازم ألاقي حمام بأي طريقة. فضلت أبص على بنزينة ولا أي حاجة، لكن ملقتش خالص، لحد ما لمحت حاجة على بعد أمتار في الصحراء اللي على يميني، زي الأكشاك اللي بتبقى عبارة عن حمام صغير كده في وسط الطرق. فرحت الصراحة، وقمت راكن ونازل، واتحركت بسرعة ناحيته.
بس أول ما شفته، قلبي اتقبض. أيوه.. ده نفس الباب اللي بشوفه في الحلم، مكتوب عليه "Men-only". التاني مش مكتوب عليه حاجة، شكله للستات. دايماً كان في حاجة بتقولي في الحلم متدخلش. قلت صدفة، عقلي بيوهمني وبيقنعني إني شوفت حلم مشوفتوش أصلاً. مش عارف، المهم مكنتش قادر ودخلت.
الحمام على عكس ما توقعت كان كبير، ويساع لأربع أشخاص جوه. فيه أكثر من حمام، وفي حوضين كمان لغسيل الأيد، جنبهم في زجاجتين مية. هو اه شكله متهالك وكإنه متدخلش بقاله فترة، مش عارف متغذي بميه منين بس مهتمتش الصراحة. أول ما دخلت، لقيت راجل بيخرج من باب من الأبواب الأربعة وعلى وشه راحة. وبعدين ابتسم قبل ما أقوله:
- عبقري اللي عمل مكان زي ده في وسط الطريق صح؟!
رد وهو سعيد:
- الصراحة اه، بيفهم. بقولك صح قبل ما تخش، أنا ملقتش المايه شغالة فجبت إزازتين من العربية، خدلك واحدة وأنت داخل بقى.
- شكراً ليك جداً، مش عارف أقولك ايه.
كويس إنه قالي قبل ما أخش، وكويس إني معايا مناديل كمان. دخلت عشان أفاجأ بريحة أقل ما يقال عنها إنها مقر...فة. وشوفت المنظر اللي عند البلاعة، مستحملتش وبعدت عيني بسرعة. الوضع جوه مكنش أفضل حاجة بس كنت مضطر. هعمل ايه يعني؟
وأنا قاعد وسامع صوت الراجل بره وهو بيغسل إيده، عيني بصت على البلاعة غصب عني مرة تانية. بس اللي شوفته مكنش زي ما كنت فاكر، كنت فاكره... بس طلع حاجة تانية خالص، طلع... في نفس اللحظة سمعت صوت الحمام الخارجي بيتفتح، وصوت خطوات رجل. فجأة صوت المايه وقف، كإن الراجل بطل يصب مايه على إيده وباصص للشخص اللي داخل.
وبعدين سمعت صوت إزازة الماية وهي بتقع. اتخضيت الصراحة، كنت لسه هتكلم بس شوفت رجل الراجل من تحت الباب، وهو بيرجع لورا، بيبعد عن الباب العمومي. وبعدين شوفت رجل تانية، رجل جزمة حريمي من غير كعب، وظاهر فوقيها زي بالطو أبيض. حسيت ببرودة شديدة في فقرات ضهري، أيوه.. افتكرتها، الست الغريبة اللي بشوفها في الحلم.
فجأة سمعت بدايات صر...خة، ملحقتش تطلع عشان في صوت خبطة سلاح حا...د قضت على صاحبها. وقع قدام الباب بتاعي بالظبط. وطيت حاجة بسيطة عشان أشوف وشه. قلبي اتقبض لما شوفت وشه اللي غرق...ان...م، عينه اللي خالية تماماً من الحياة كانت بتبصلي، وفي دماغه راشق حاجة شبه البل...طة!
وفجأة لقيت إيد بتمتد ناحيته، أيوه.. إيديها، إيديها اللي كانت أقرب لإيد الرجالة أكثر من إيد الستات. وبعدين شدتها من دماغه، عشان يصدر عنها صوت خلي جسمي كله يقشعر. سمعت صوت مسح كإنها بتمسحها في هدومها أو حاجة زي كده. أنا.. أنا مش عارف أعمل ايه، أنا مرعو...ب، وكمان الشمس شبه اختفت والموضوع بقى مر...عب بدرجة محدش يتخيلها!
لكن... أكيد هتخرج دلوقتي. هي خلاص عملت اللي عايزاه. بس مين دي أصلاً؟ لقيتها بتقرب ناحية الباب العمومي وهي بتعمل لحن ببوقها، لحن مرعب! بس... ايه اللي سمعته ده؟ أنا سمعت صوت تكة مفتاح. دي... دي قفلت الباب العمومي بالمفتاح. أنا حاسس إني عايز أعيط. هعمل ايه؟!
هعمل ايه؟!
شفت رجلها بتقرب من جثة الراجل، وقعدت على صدره. البالطو الأبيض كان واضح جداً. طلعت كذا أداة من جيبها، وحطتهم جنبها: مشرط، سكينة، وغيرهم. وبدأت تعمل أكثر حاجة بشعة ممكن حد يعملها. كانت بتشرح في جثته!
كانت بتدندن بلحنها المرعب وهي بتطلع في أعضاؤه برة، وتحطها جنبها. لا... أنا مبقتش مستحمل اللي بيحصل. جسمي كله بيترعش. طلعت حاجة من أحشائه وبتبص حواليها، كأنها مش عارفة تحطها فين، مش لاقية مكان. خلاص أنا مش شايف وشها بس فاهم كل ده من حركة جسمها. بصت ناحية كتفها اليمين، عشان... عشان صوت اللحن يسكت تماماً. فضلت مركزة، كأنها شافت حاجة، والحاجة دي كانت رجلي.
