نزلت السبت وانا بتكلم علشان ياخد باله:حمدلله على السلامة ياعمو.
رفع راسه ليا وهو بيحط الكيس اللي معاه في السبت:اللي جابلك يخليلك.
طلعت السبت ومسكت الكيس ورجعت بصتله تاني فكان رافع راسه باصصلي بأجمل ابتسامة في الدنيا:برضو مش هتطلع؟
-هاجي مع حازم لما نخلص.
هزتله راسي وسيبته ودخلت البيت وانا بحط الكيس قدام ماما اللي كانت قاعدة مع حلا اختي الوالدة في نفس السرير:حمزة جاب الاعشاب.
-روحي اعملي لاختك طيب.
بصتلهم بتعب:من ساعة ما بقيت خالتو وانا مبرتحش تلت دقايق على بعض.
دخلت المطبخ، فتحت الكيس وبدأت ابتسم لما لقيت وردة جوا الكيس.
مفيش فرصة ممكن يجيبلي فيها وردة هو ممكن يضيعها ابدًا.
حركة رجعتلي طاقتي تاني..
اخوه واختي اللي خلفوا اه بس ده علميًا،
لأن عمليًا زين حبيب خالتو هو ابني انا اه.
روحت فتحت الباب لما الجرس رن، دخلوا وهما في ايديهم اكياس كتير ف اتكلمت بسرعة:هناك هناك عند حلا.
وقفت سلمت على طنط وقفلت الباب ودخلنا احنا الاتنين وراهم وهما بيفتحوا الاكياس اللي جايبينها.. اكياس فيها حاجات السبوع!
قعدت جمبه لما لقيته شايله وقاعد في كورنر وملوش دعوة بحاجة تانية، رفعت عيني له بعد ما فضلت شوية باصة لزين لقيته باصصلي:باصصلي كده ليه؟
-لقيت حاجة احلى من زين، هو احنا هنتجوز امتى؟ الخطوبة طولت ودمها بقى تقيل.
وقفت قدامه:هنتجوز ان شاء **** بس اديني الواد.
-لا..انا شوية وماشي.
-هاته ياحمزة مش بهزر.
-انا عمه.
-وانا خالته.
-على عيني وراسي ياخالتو بس هو دمي انا.
لفيت لمامتي ومامته بعصبية وانا بشهدهم عليه:بقا كده؟
بصوا لبعض وهما بيضحكوا بغلب وماما بتتكلم:وعاوزين يتجوزوا، علشان يخلفولنا عيال هبلة.
لفتله تاني لما حسيته بيقوم حط زين في ايدي وهو بيتكلم:يابخته حظه الحلو جه كله في خالته.
رفعتله عيني وانا بضحك:وحظ خالته الحلو كله جه في عمه.
