كل ما بشوف فيلم الكيت كات
بشوف أعنف ما قيل في الرغبه قبل الحب
بتأمل هل يا تري ازاي الانثي لما تعشق راجل ممكن تكون علي قدر من الشراسه الحنونه المجنونه
لمجرد بس انها تلاقي في حبيبها حضن تسكن إليه
مع أن مفيش بينهم كلام و يادوبك شوية سلام
علاقة فاطمه ب يوسف طول الفيلم محدوده
و محاولاتها المستميتة بس للفت نظره
فيها كميه من المشاعر تخليك تبقي عايز تضرب يوسف ده مئة قفا
بس لما تشوف فاطمه و رغبتها المتوحشه في اكتساب حتي نظرته تحس انك عايز تكون مكانه
بقف عند مشهد فاطمه ( عايده رياض) و هي في مقام سيدها المغربي
و بشوف ابداع من المخرج داود عبدالسيد في كتابه النص ده و الاحساس الي فيه و ازاي قدر يوصل جنون الرغبه و الحب في وقت واحد
اسيبكم مع المشهد :-
مابقتش عارفة طعم اللقمة ..
مصارينى بتنهش قلبى يا سيدى المغربى ..
روحى رايحة منى رجعهالى قلبى بيتخطف لما حد بيجيب سيرته قدامى
ابن الكلب مش شايفنى ..
لو شافنى مرة واحدة .. لو بص فى عنيا
حخليه يسف تراب رجليا ..
حخرب بيته ..
حخليه يحف الشطة السودانى فى عروقه والنار فى جوفه والكل السعران بينهش قلبه
حخليه مجذوب ..
درويش ..
يبصلى .. لو راجل يبصلى ..
لو راجل من ضهر راجل يبص لعنيه ..
لو راجل حخليه خرقة قديمة ومهلهلة ..
حعلمه ازاى يبقى راجل وازاى يموت ويتعذب عشان واحدة ..
بس اديهونى يا سيدى المغربى ..
اديهونى يا اما حموت نفسى
انا بحبه
