تذكري واغصون .
تذكري واغصون ؟
يوم كان القمر
مختبي بالعيون
قلتله وااااقمر
مو الذي دخلك
وسط بحر الشجون ..
قال : حكم القدر ..
ساقني للعُبر
والهوى ما أمر .
كيف يشاني أكون ..
تذكري واغصون؟
يوم كنا زغار
كم شربنا سوى
من عيون الجرار
كم سرقنا الهوى
من لقوف الكبار
كم عشقنا الجنون ..
تذكري واغصون..
كيف كنت أبقصيك
وأحدفك م أستحيش ..
كيف كنت أخضبيك ..
صبح مثل ألجهيش
كيف كنا نذوب
عشق بين الحشيش ..
تذكري زلتي
يوم كنت أختبي
وأفجعيك بالعريش .
لو أشوف مبسمك
ألمصائب تهون ..
تذكري واغصون..
دمعنا بالحيود
حــــــاميات ينزلين
يصمطين الخدود ..
العيون جرحين
والصدور ارتوين
بعد ما اتلاسقين
ينشدين الوعود ..
تذكري بالمصر
كيف كنتي بصر
تمسحي لي الجفون ..
تذكري واغصون ..
تذكري جمعنا
يوم كانه السحاب
ترتعش فوقنا ..
قلتله واااااااااااسحاب
ليش .. مو أحنا خياب ؟!
تمطري حولنا
تسكبي جرتك
للشجر والذياب
وإحنا جنبك غباب
ظامئين كم لنا
قلتلي ظمئتك
واحبيبي الهوى .
مطرتي للذي
ماعشق وأكتوى
إشتعيش إشتعيش
كان بي أو بدون ..
تذكري واغصون ..
تذكري للديام
كم طلعنا نهور
كم رعينا الغنم
وأحتضنا العجور
كم زرعنا وكم ..
القُبل بالنحور ..
وعاده ذا عهدنا
بالمخالف يفور
السماء بيننا
شاهده والطيور
والشقر جنبنا
يستقي حُبنا
يرتوي للجذور ..
وبعد هذا الهوى
كيف واحد شخون..
صاحبه واغصون
تذكري واغصون؟
يوم تركتي البلاد
ضاع طعم السبول
وأكتسين الحقول
برحيليك سواد ...
والغصون واغصون
بعد هجرك ذبول
البقر والعجول ..
والصفاف.. والجراد
والشيوخ والعدول
والوقيد ..والرماد
كُلــــــــــــــهم أهتروا
يسألوني عليك !!
وأنا آآآآآح
مو أقول ؟!
أسألك بالذي
أمنت به العقول
مو أقول
