عارف إمتى تكتشف قيمتك الحقيقية عند أي إنسان؟
لما تزعل.. وتشوف رد فعله.
لما تسيبه من غير كلام وتشوف هل هيجي يدور عليك ولا هيسيبه يعدي عادي.
ساعتها تعرف مكانك عنده فين بالظبط، بعيد عن كل الكلام الحلو اللي بيتقال، بعيد عن الوعود اللي بتتكرر، بعيد عن "أنا مقدرش أعيش من غيرك".. لأن المواقف هي اللي بتفضح، والزعل هو أكتر وقت بيكشف حقيقة المشاعر.
القلب اللي بيحبك بجد، مستحيل ينام وهو عارف إنك موجوع أو زعلان منه. مستحيل يسيبك للأيام تاكل فيك والوجع يهدك، ويقول "هو هيهدي من نفسه". لا يا صديقي، اللي بيحبك هيجري عليك قبل ما يسيب دقيقة واحدة من حزنك تاخدك بعيد عنه. هيعتذر حتى لو مش غلطان، هيحاول يضحكك حتى لو هو اللي مكسور، هيفضل يدور على أي طريقة عشان يطبطب على قلبك.
لكن للأسف، اللي يسيبك تزعل يوم ورا يوم، وأسبوع ورا أسبوع، وما يبذلش أي مجهود عشان يصلح أو حتى يطبطب، صدقني عمره ما كان شايفك حاجة مهمة.
هو ممكن يكون اتسلى بوجودك فترة، أو لقاك شخص بيكمل فراغه، لكن ماكنتش قيمة، ولا كنت غالي عنده. لأن الغالي ما يستحملش يتألم، الغالي ما ينفعش يبات زعلان، الغالي مش بيتساب لوحده يحارب حزنه.
والمؤلم في الموضوع مش بس إنهم سابونا نزعل..
المؤلم إننا كنا فاكرين إننا غاليين عليهم، وإننا لينا مكانة جوة قلوبهم، وإنهم هيجروا علينا أول ما يلاقونا زعلانين. لكن اللي حصل كشف إن مكانتنا كانت "وهم" وإحنا اللي صدقناه.
عشان كده، ما تزعلش من اللي سابك في عز وجعك.. بالعكس، اشكر الموقف اللي ورّاك حقيقته. اشكر الوجع اللي كشفلك قيمتك عنده، لأنه وفر عليك وقت كنت هتضيعه مع حد مبيستاهلكش.
وخدها قاعدة: اللي يهون عليه يسيبك وأنت موجوع، عمرك ما هتكون غالي عليه. اللي سابك يوم، يسيبك عمر، واللي استسهل بعدك مرة، يستسهلها كل مرة.
أنت تستاهل اللي يجري عليك لو دمعة نزلت من عينك، اللي ييجي يطبطب عليك لو حس إنك مش على طبيعتك، اللي يحس بيك من غير ما تتكلم. تستاهل اللي يضحي براحته عشان يردلك ابتسامتك، مش اللي يسيبك للأيام تمسحها لوحدها.
فأوعى تعاتب اللي سابك تزعل بالأيام والشهور.. لأن العتاب غالي، وانت ما ينفعش تديه لحد ما قدّركش. سيب اللي ما قدّركش، وخليك مع اللي يعرف قيمتك.
لأن اللي بيحبك بجد مش بيستحمل يشوفك مكسور، ومش بيستنى منك تطلب منه يقف جنبك.. هو بيكون موجود من نفسه.
