احنا 3 إخوات بنات
بابا وماما اتوفوا وسابونا لوحدنا
احنا التلاتة بنشتغل وملناش غير بعض
عايشين سوا في شقة إيجار، أنا الأخت الكبيرة ومن بعد وفاة ماما كنت بقوم بدور الأم
وبعد وفاة بابا بقيت أم وأب برغم إني مش أكبر من اخواتي الاتنين بكتير
أنا أكبر من واحدة ب3 سنين ومن التانية بـ5 سنين
كنت مُجبرة أكون أب وأم مع إني لسه صغيرة أنا كمان ومعرفش حاجة في الدنيا
بس لقيت كل اللي حواليا واخواتي بيحطوني في الخانة دي
وغصب عني شيلت الحِمل وبقى أمر واقع
إخواتي كانوا راميين عليا كل حاجة
قولت يمكن دا في البداية بس وبعد كدا هننظم الدنيا ونقسم المهام بينا
لكن دا محصلش أبدًا...
بالعكس أنا اكتشفت إن اللي بيوافق ويشيل شيلة مش شيلته
أو يتحمل مسؤولية حاجة على سبيل المساعدة بتتحول لأمر واقع وحق مُكتسب
أنا فجأة لقيت نفسي بشتغل في وظفتي وبشتغل في البيت كمان
بنضف وبطبخ وبرتب
مش بس كدا لاء أنا كمان أنا اللي بدفع الإيجار والفواتير وبشتري طلبات البيت كلها
يوم بعد يوم اكتشفت إن المرتب ومعاش بابا مش بيكفوا مصاريف اخواتي الاتنين
أنا جه عليا وقت مكونتش بلاقي فلوس أركب مواصلات علشان أرجع البيت
وكنت بمشي ساعة ونص على رجلي علشان أعرف أوفر تمن فاتورة الكهربا
ولا فاتورة النت
في الوقت اللي كانوا إخواتي موفرين مرتبهم وبيشتروا بيه ميك أب وبرفانات
وبيخرجوا أحلى خروجات
يعني تخيل أنا برجع من الشغل مشي وفي المقابل اختي بتشتري لبس واكسسوارات
حاولت اعترض أكتر من مرة كان ردهم..
"إنتي اختنا الكبيرة واحنا ملزمين منك ثم إننا بنسيبلك نص معاش بابا بحاله عاوزة ايه تاني؟"
منتهى البرود والبجاحة والاستحقاقية ومش قادرة أفهم جابوا الجبروت والقسوة دي منين!
حاولت استحمل الوضع دا كتير لكن مقدرتش
حاولت أتفاهم معاهم لكن دايما كان ردهم جاهز "إحنا مسؤولين منك"
ليه أتحمل المسؤولية لوحدي؟؟
أنا كمان بنت زيهم مش راجل
أنا تعبت ومبقتش قادرة أتحمل الإرهاق الجسدي والنفسي
قررت إني أبطل أطبخ وأعمل شغل البيت
لكن الحياة قلبت بخناق وزعيق والجيران بقوا يسمعوا صوتنا
بعد ما كنا طول عمرنا عايشين في حالنا ومحدش سمع لينا حس
بعد وقت كبير من التفكير والمشاكل أخدت قرار والحقيقة معرفش
هل دا قرار سليم أو لاء؟ ولا مجرد قرار اتاخد وقت عصبية
قررت أسيبلهم البيت وأمشي
دورت على سكن في بيت طالبات وبالفعل أجرت أوضة على أدي في مكان قريب لشغلي
ومعايا طبعًا الفيزا بتاعت معاش بابا
قررت أعيش لنفسي وأكون أنانية لمرة واحدة في حياتي زي ما هما طول عمرهم أنانيين
قمت الصبح قبل ما يصحوا يروحوا أشغالهم لميت هدومي ومشيت
من غير رسالة ولا كلام ولا أي حاجة
أخدت نفسي وروحت الأوضة اللي أجرتها
محدش أخد باله إني مشيت غير بالليل لما لقوني مرجعتش ولا طبخت الغدا
اتصلوا بيا كتير لكني مردتش
أنا كنت قاعدة في كافيه باكل آيس كريم ومستمتعة بالمزيكا اللي شغالة
كنت مستمتعة بكل حاجة حواليا لأول مرة من فترة طويلة أوي
جولي تاني يوم مكان شغلي وهما كلهم غضب وقلق
هما يمكن فكروني حصلي حاجة يمكن قلقوا أو يمكن بس زعلوا على الخدامة بتاعتهم
الحقيقة معرفش
لكني قابلتهم بمنتهى البرود وقولتلهم أنا سيبت البيت وهعيش لوحدي
قولتلهم اتحملوا مسئولية نفسكم
قولتلهم خلاص أنا مش هصرف على حد ولا هطبخ ولا أكنس
ادفعوا إيجاركم وفواتيركم
اطبخوا ونضفوا لنفسكم علشان أنا خلاص قررت أشتري نفسي
مش محتاجة أوصف رد فعلهم من زعيق وخناق وعصبية
لكني متأثرتش
هما لازم يتعلموا يشيلوا مسئولية نفسهم
لازم يعرفوا أد ايه الحِمل كان تقيل عليا
لازم يستوعبوا إني بنت زي زيهم
معرفش قراري إني أمشي وارمي ورا ضهري كان صح أو لاء
كل اللي أعرفه إني كان لازم أشتري سلامي النفسي حتى ولو لفترة مؤقتة
لحد ما اخواتي يعرفوا إن الحياة مشاركة وإن المهام لازم تتقسم علينا
وإني مش لازم أشيل كل حاجة لوحدي.
