عارفين إيه أكتر فتنة موجودة في الحياة دلوقت للستات والرجالة؟
مش الست اللي بتدحلب عشان تخطف راجل.. لان ولامؤاخذة مفيش راجل عيل بيتخطف .. هو بيروح بمزاجه
ولا الراجل اللي بيفضل ورا ست متجوزة عشان يستميلها.. مفيش ست بتفتح الباب ده الا وهى بتفتحه وهى شايفة الاستمالة بوضوح
اه جايز بيضعفوا.. لكن دي فتنة داخلة كده بوضوح على ضعف عندهم.. عشان تقولهم انتبهوا ابوابكم مفتحة.. وانتوا ضعفاء اوي.. واللي في قلبه خير **** بيحفظه أو بيربيه وبيطلع من التجربة لو عايز يحسن من نفسه متعلم الدرس كويس
لكن الفتنة الحقيقية الراجل المحترم اللي مش بيحاول أصلا مع الستات في دايرة شغله وتعاملاته الحياتية
والست المحترمة المهذبة اللي بتتعامل مع زمايلها بأدب واحترام ومن غير تعدي حدود
لكن مش بينتبهوا لنقطة مهمة.. ان كل حركة مهذبة لمساعدة طرف من الجنس الآخر ممكن تسبب "ميل قلبي"!
دي فتنة ظاهرها حلال.. وجواها كل خطوات الحرام بداية من الخطرة!
كل كلمة طيبة بتتقال ممكن تخلي القلب يزوغ..
"مضايق من ايه"
"انت كويس"
"عندك مشكلة، اقدر اساعدك"
تقديم الخدمات.. وتقديم الدعم للجنس الآخر
ده باب فتنة بيقيد نار في قلب المتلقي!
البيوت ماليانة هم ووجع.. ستات زعلانة عندهم احتياج هاطفي والزوج مشغول مسكين في لقمة العيش أو زوج مش منتبه لمشاعرها.. أو حتى زوج مقصر
والرجالة مسحولة وبتحب تنوع اوي بالذات لما تضغط ويلاقي مراته مضغوطة.. بيقع من غير ما يحس في الحنية اللي بيلاقيها مغلفة بأدب شديد
بتحب تشرب حاجة
طب انت شكلك مضغوط مش هخلي حد من الشركة يكلمك لغاية ما تفوق
من فضلكم.... بلاش في بيئة الشغل "نحسس الآخر باننا حاسين بيهم"
بلاش الدخول في زون المشاعر ابدا
بلاش نحل مشكلة ليهم ونعدي خطوة لقلوبهم
اه.. في الاختلاط مش المهم ابدا عطاء سعااتك ولطف سياااتك.. خليهم لاهل بيتك هتبقى خير الناس "خيركم، خيركم لأهله"
في الاختلاط تؤجر اكتر في الحدود!!
متنزلش الكلفة..
متحسسش اللي قصادك بألفة
متتبسطش في المعاملة فياخدوا عليك
خلي معاملاتك في الشغل والكلام في الشغل
ملكوش دعوة بمشاكلهم واحتياجتهم
ليهم دوايرهم يغطوها
ما دام راجل وست
وبالذات المتجوزين اصلا.. لما تروحوا الشغل خلوا تعاملكم انساني عام
بلاش تكونوا فتنة لغيركم..
خليك واضح
وفي حالك
وانسان للكل بشكل عام
متدخلش في خصوصيات
وبلاش تمضية الوقت مع جنس اخر بلا هدف
وخد نية الحفاظ على القلوب
الميل القلبي ده ممكن يهد بيوت..
ويدخل زعزعة نفسية للشخص ويلغبط قيمه
وتبقى سبب في آذاه..
غلطك انك لم تتق **** في الاختلاط.. واللي بيتقي الشبهات فقد استبرأ لدينه وعرضه
دكتوره روفانا حكيم
مشكله اجتماعييه صديقي مع زوجته المفرطة في التتبع والمراقبة