طلعت من البيت رايحه مشوار ، ركبت عربية مع سواق باين جدا انه مبرشم .. مبرشم حرفيا .. وشه متأثر قوي بالبرشام .. ركبت قدام .. انا وهو لوحدينا .. العربية حملت وطلعنا .. دفعتله خمسة جنيه .. واداني اتنين ونص .. شوية بتاع كيلو كدا .. قالي انتي خدتي الباقي بتاعك قلتله اه .. قالي لا مخدتوش .. قلتله و**** خدته .. قالي متحلفيش .. انتي مخدتوش .. روحت مطلعاله الاتنين ونص من جيبي قلتله اهو عشان تصدق .. قالي لا متضحكيش عليا .. متطلعيش فلوس من جيبك وتقولي اهي .. انتي ليك 2 ونص .. قلتله بس انا و**** خدتها حرام اخد فلوس حرام .. قالي ومش حرام تزعلي اخوكي بصلة .. قلتله طيب يريحك ايه .. قالي تاخديهم مني .. قلتله هات.
شوية بشوية .. قعد يمشي يمين وشمال .. خبط في عربية ملاكي وزنق علي عربية ميكروباص .. فالاتنين نزلوا وجوله كل واحد ع شباك .. واحد قاله انت خبطت فيا وواحد قاله انت زنقت عليا .. سابهم وبصلي قالي " هما بيكلموكي انتي ولا انا يا استاذه".. قلتله انت اللي سايق يعني بيكلموك انت .. قالي بيقولوا ايه عشان سامعهم بيصوصوا مش بيتكلموا .. قلتله بيقولوا انك زنقت عليهم .. قالي ما انا قاعد جنبك اهو ولا نزلت من العربية ولا زنقت على حد .. بذمتك انا اتحركت من العربية ..
يا استاذ بصلة .. هو قصده ان العربية هي اللي زنقت على العربية .. قالي طيب وهو بيكلمني انا ليه ما يكلم العربية.
مسكت نفسي من الضحك شوية .. مشي 200 متر وقالي .. هو احنا كنا بنتخانق مع الناس ليه .. قلتله متشغلش بالك دا حاجة ليها علاقة بمصاريف المدرسة وانا حليتها .. قالي طيب انا اديتك باقي الاجرة بتاعتك .. قلتله اه مرتين .. ادتهالي مرتين .. وبص قدامك هنلبس في العربية ال قدامنا .. قالي يا استاذه متضحكيش عليا .. انا مدتكيش الاجرة .. و**** لا تاخدها .. يا عم و**** خدتها.. قالي و**** لو مخدتها ما اكلمك تاني.. يا سيدي احسن ما عنك ما كلمتني.. يعني هتزعليني يا استاذه قلتله اه.. قالي طيب طلاق تلاتة لانتي واخده.
المهم عشان الطلاق.. خدتهم.. ومسكت الفكة كلها في ايدي.. بصلي كدا بصة شك.. وقالي بقولك ايه يا استاذه.. قلتله نعم.. قالي ما تجيبي الفكة دي وخدي الخمسة جنيه الصحيحة.. عشان ادي الباقي للاستاذ اللي جنبك.
نزلت وانا ونازله قالي سامحيني بقي في الباقي.. انتي شايفه اهو مفيش فكة
😂😂😂
همووووووووت
