كنت فاكرة إن فيلم ولاد العم مجرد قصة فيلم مرعبة لما
مني زكي اكتشفت إن جوزها اللي عايشة معاه يهودي إسرائيلي خطفها وهي ما تعرفش..لكن الحقيقة إن الواقع في المجتمع المصري طلع أبشع...أنا كنت عايشة في بيت واحد مع عدوي وأنا معرفش بناكل ونشرب وننام ونصحي ونخرج ونلعب ونسافر سوا...بيمثل الحب والاهتمام لأقصى درجه كل اللي يشوفه يقول عليه زوج مثالي..بس الحقيقة إن كل ده كان تمثيل وتخطيط للغدر...اه كان فيه خلافات من فترة كبيرة بسبب الأهل بس بقالنا سنة ونص عايشين في سلام فجأة وبدون مقدمات ابني آمن اللي عنده سنة وعشر شهور خده مني ووداه لأهله اللي بيحاربوني من غير سبب من أول الجواز...تخيلوا نبقي خارجين وبنتفسح مع بعض وبيدلعني وبعدها بثواني يدخلني مطعم عشان يشتري حاجه أديله ظهري ثانية الاقيه اختفي بإبني ويقفل تليفوناته و جايب عربية مستنياه بتخطيط من أول اليوم زي العصابات !!!! متخيلين الرعب ولا أقول أكتر؟ يعني مش اتخانقنا مثلا وخده ومشي او شدينا في الكلام حتي ولا قبلها بأيام ولا شهور حتي!! عملت محضر في وقتها طبعا والسيد المستشار المحامي العام للنيابة الفيوم جاسر المغربي ورئيس نيابة الفيوم الكلية السيد المستشار محمد طارق لم يدخروا جهدا لإستخراج قرار فوري بتسليم الصغير لحاضنته والمساعدة علي تنفيذه حتي الان .
بس للأسف زوجي وأهله مخبيينه وبيغيروا مكانه...حاولنا نكلم أهله بس مفيش فايده منتهي الجبروت مش راضيين يرجعوا الولد او يخلوني أشوفه وأخت جوزي دكتورة النسا تتخانق معايا وتقولي الولد شرعا لابوه الست ترضع وتدي الولاد للأب!!!! متخيلين؟
وطبعا مش محتاجه أقول إن المبررات اللي بتتقال كلام أهبل وافتراءات وأقوال متضاربة عشان يبرروا خيانة الأمانة والظلم والغدر!!
طبعا إحنا متجوزين والولد عايش معايا ومع أبوه في بيت واحد عشان محدش يدخل يقول اصل الام بتمنع الأب عن عياله والتبريرات ده...
وللعلم الأب مهندس بترول يعني طبيعة عمله في البريمة في الصحرا يعني كده هيخلي الولد يعيش من غير أم وأب!!!!!
كنت فاكرة إن الإنسان أما بيغلط اللي حواليه بيقوله غلط عيب حرام لكن اللي شوفناه جبروت وأذي ودعم وتحريض رهيب...رفض لتطبيق القانون وبلطجه...بيحرم *** مكملش سنتين من أمه ويحرم أم من إبنها عشان يديه لأهله ويراضيهم...٢٢ يوم ماعرفش ابني فين ولا عارفه أشوفه...والمطلوب مني كمواطن إن أنا اللي أعرف مكان إبني فين عشان أنفذ القرار...بجد إيه الأدوات اللي مفروض المواطن يستخدمها عشان يعرف مكان إبنه في موقف زي ده خصوصا إن المشكو في حقه أكيد متعمد إخفاؤه يعني طبيعي هيهرب بيه وقت التنفيذ ...لازم يكون في طريقة في مصر لتنفيذ القرارات ده لأن فيه أمهات كتير حقيقي مابتشوفش عيالها تاني...ده صور آمن يا ريت اللي يشوف او يعرف حاجه عنه يبلغنا بمكانه... وصورتنا وجوزي حبيبي بيفسحنا في الغردقة قبل ما ينفذ الخطة بأيام!
البوست ده يا جماعة عن واقعة محددة (أخذ الطفل من أمه بالمؤامرة والغدر) عشان اللي يقدر يساعدني في الوصول لآمن وتطبيق القانون مش للخوض في الخلافات الزوجيه الحالية او السابقة لتبرير الواقعة زي اي حاجة بتحصل ضد الستات في مصر
